News making rounds on X dey talk sey one black American man identified as Telbo Rackins Osborne don lose him life to gunshot from him white girlfriend.
According to di gist, Hannah Grace Cobb been shoot 30 year-old Osborn on February 23, 2025 for Midville, Georgia, but di police no quickly arrest her for di alleged crime.
Di family of di victims later come to social media to demand justice for their son, and some black American people support di family to seek for justice leading to di arrest of Hannah Grace Cobb, and her being charged to court for “involuntary manslaughter”.
Upon some investigations, di Burke County Sheriff’s Office confirm sey di shooting happen around 5:45am for 800 block in Four Points Road near Waynesboro.
When them find Osborne, him been de suffer from gunshot wound for him chest before them later confirm am dead for hospital.
Social media reactions to black American man killed by his white girlfriend
While di investigation still dey go on, some social media people dig out old tweets of Osborne where him been de talk down on black women.
As expected, di tweets stir some reactions among di black American community for X where most of them, especially women refuse sey them no go out body for di matter as e no concern them.
Others liken di incident to that of US-based Nigerian man, Christian Tobechukwu Obunseli wey been de express him hatred for black women only to end up killed by him white OnlyFans model girlfriend, Courtney Tailor Clenney.
