Things cost normal normal, but the way things take cost this year eh, e too heavy for mouth. And all this na because of the subsity removal wey Mr president remove.
Based on how things cost now, many people wey don plan to marry this year don de wonder wetin them go take do with the ₦500k wey them don save.
Even as things cost, make your mind no cut because even with your ₦500k, you go for run one small wedding like that if you plan well.
Cut Your Coat According To Your Size
By now nobody supposed to tell you sey make you cut your coat according to your size. Make you no go put eye for wetin big pass you. No be everything you go do for your wedding.
E get some things wey no too necessary, those ones gats go then you go use the money arrange am make e reach all the necessary things.
1.Use Free Venue
Instead of make you go the pay money for reception venue, use your church premises or your papa house for reception. Normally even reception sef fit go, but sake of sey make e no too bad, you fit use any of the above mentioned venues to cut down cost. Then you fit use like ₦30-50k to rent chairs.
2.Invite Few Guests
Make the wedding be strictly by invitation and make e no pass 100 people. You fit even make am less but it you be person wey sabi plenty people, 100 guests no too bad.
3.Make A Budget For Each Guest
Make a feeding budget for each guest you invite. Say for instance you go budget ₦1000 feeding per head. That is a total of ₦100k for feeding.
4.Rent Wedding Gown
Use like ₦50-100k to rent wedding gown. Wedding gown na one of the things wey de chop money Wella for wedding, but if you rent one you go save money for other things.
5.Use Affordable Make-up
If any family member or friend sabi do make-up, you fit use them. Or you go budget like ₦30k for make-up and to avoid anyhow work, nude make-up naim be the best.
6.Use Local Dj
Any DJ wey sabi play good music for una area go fit do the work. And you go budget like ₦30k-50k for the work.
7.No Give Souvenir
No be must to print jotter or give souvenir for your wedding but if you must give, give the ones wey dey cheap like plastic hand fans, bowls and plastic cups. This one fit take like ₦20k-30k
With all these ones, you fit still get small change make you and your new wife take see front. Or you fit still add small money for the feeding make the people no swear for the two of una.
