Trouble de sleep yanga come wake am. Na so this morning, kasala burst for social media as South Africans and Nigerians decide go aura for aura.
Underlying story behind Aura for Aura
How e take start? E get one girl wey been contest for Miss Universe South African. Her name na Chidinma and her papa na Nigerian.
South Africans come de dig about the girl sey she no supposed de contest because she no be South African. As them dig, them come bring one tori sey l, her people fake documents for her to de stay for their country.
Na so the girl come withdraw from the contest even as she be finalist. But even as she withdraw from the contest, South Africans never stop to de drag Nigerians like ‘I pass my neighbor ‘, every day na new dragging.
Nigeria won 😂😂 pic.twitter.com/CIqmNRR0UP
— HARRISON 👑 (@harrisonJNIOR) August 22, 2024
Na this dragging naim them carry reach bolt side today. South Africans wake up decide sey them go frustrate Nigerian bolt drivers.
Na so them go sidon for their country, order bolt for Lagos from very far distance, when the driver don drive reach the destination, them go cancel the trip.
Many South Africans come jump on top the trend the use Nigerian bolt drivers catch cruise. Na so Nigerians decide give them back make e be aura for aura.
As them follow match their energy so, some news blogs for X come talk sey, Nigerians don crash bolt for South Africa, sey all the rides for there dey booked.
This aura for aura trend come produce maximum vawulence as both South Africans and Nigerians de catch serious cruise. One Nigerian X user come talk sey, South Africans dey pay to cancel their rides but Nigerians na free them de cancel the rides. Sey fight never start Nigerians don win.
