When Nigerians think about traveling for vacation, di only countries wey de come their mind na USA, UK and Canada, because for their minds, na only these countries you fit dey safe to enjoy your trip.
But inside this our Africa, many countries dey very safe and enjoyable. Na why we gather these top 10 safest African countries in 2024 for Nigerians wey wan travel.
Factors to consider when choosing a country to visit
Many factors dey wey fit affect your choice of countries:
1. Receptiveness of the people
Some countries no de welcome visitors because of personal reasons.
2. Safety
Because sey country fine no mean sey e safe for visitors.
3. Cultural/Religious differences
Culture and religion na big factor wey de influence people emotions. Some countries fit no accept you if you get different culture or religion from their own.
4. Exchange rate
Money Na big factor wey go determine weda your vacation go dey well or you go suffer. Try to know the exchange rate of your country’s currency with the currency of di country wey you want visit, e go help you know how much money you need for di journey.
Top 10 Safest African Countries to visit in 2024
1. Mauritius
Mauritius na number #22 for Global Peace Index as one of di safest countries for this entire world and #1 as the most peaceful country for Africa.
E mean sey, if you visit the country, you no need watch your back because, peace choke. No agbero or kidnappers wey go de cut your mind. E no only safe, Mauritius na fine country too and many new couples de go there for honeymoon.
2. Madagascar
Madagascar na Odogwu silencer for enjoyment matters, e dey number#44 for Global Peace Index and #2 for Africa. The country na one island wey no too de show off. Di country dey very low-key, because you no go see their name for wahala. If you be person wey no too like crowd and noise, Madagascar na perfect vacation destination for you.
3. Botswana
For Africa na Botswana be #3 as one the safest countries to visit. This country na home to very beautiful safaris wey you fit enjoy do view of nature as you de do your holiday.
4. Ghana
Our neighboring country wey we de always swear for dey among di top 10 safest African countries in 2924 wey you fit visit. Ghana dey #55 for Global Peace Index and #4 for Africa because their people dey very peaceful and welcoming. For first time visitors wey wan enjoy Africa, Ghana na top recommended country wey them go enjoy.
5. Zambia
Just like Botswana, Zambia na another safe country with beautiful safaris wey you fit enjoy when you visit. Di country dey #57 for Global Peace Index and #5 for Africa as top 10 safest African countries to visit in 2024.
6. Namibia
Another safe country wey you fit visit with your friends and family for 2024 na Namibia. For 2022, them rank #62 for Global Peace Index and #6 for Africa.
Just like every normal country wey humans dey, Namibia no be crime free country but their crime rate dey very low, na wetin make am safe for visitors be that. But if you want visit am, try look out for yourself and keep all your valuables in a safe place.
7. Tanzania
Inside 2022, Tanzania move from #86 to #65 for Global Peace Index and #7 for Africa. Them also get beautiful safaris like Serengeti, Ngorongoro, Taraginhe, Ruaha, Kilimanjaro and others wey na great tourist attractions for new visitors. The Tanzania government don set up di safaris well to support their tourism industry, if you be person wey love nature, you go enjoy Tanzania.
Their most popular area na Zanzibar, with beautiful clean water and parks, you go really enjoy your stay for di country.
8. Morocco
Morocco na another safe country to visit in Africa. Many people wey don visit di country before no too get complain about di place because them no de get too much crime for there. But if you be gay, you fit no enjoy your stay there because Morocco na country wey never accept LGBTQIA yet.
9. Tunisia
The people of Tunisia na people wey get goo composure and peace. Them no de do garagara na why you go hardly hear their name for wahala. Their country dey very safe to visit and them get rich cultural heritage wey de interest many first time visitors.
10. Malawi
No be mistake sey di motto for Malawi na “Warm heart of Africa* because them really get warm heart and very peaceful. Malawi dey #80 for Global Peace Index and #9 for Africa.
Their people dey very friendly and them get fine places like Majete, Liwonde and the freshwater paradise o Lake Malawi as some of their interesting places to visit.
General safety tips for traveling
Even as them don certify these countries as the top 10 safest African countries to visit in 2024, e good to always stay guided. Because anywhere wey human beings dey, one or two crimes must sup. Na why we de suggest these 5 safety tips for when you de visit any new country:
Research about your country of interest:
The best thing wey you go do for yourself na to know where you de go so that you go prepare ahead.
Before you decide visit any country, read about di country for internet and social media. Some things wey them fit accept for your country fit dey illegal for another person county. Some people don fall inside wahala because them commit one or two wey them for avoid. Try do research about di kind clothes wey them de allow for public, di way man and woman de relate for there, some places wey them no de allow visitors enter.
Befriend an indigene of your country of interest:
If you de go for solo vacation try to find one person wey be indigene for di country wey you want visit. Them fit make di holiday more interesting for you, and fit give you OT for wetin de sup for their country. Also, you go make foreign friends.
Over prepare
E better make you over prepare than make you under prepare. Carry extra clothes, extra money and other essentials wey go make your holiday enjoyable. E go bad make you dey stranded for another person land, but if you get extra, you fit manage yourself till you leave.
Be open-minded
Keep am for mind sey na another person country you de visit so you have to be open minded about how them de live their life. Their food, language, mode of dressing and belief systems fit dey different from di one wey you know. No go enter inside argument with person or insult their food because you fit enter wahala wey go pass you.
Prepare ahead
Avoid last minute preparation because you fit forget some important documents and materials wey you go need for you trip. Always try to prepare days or weeks ahead of your trip so that you go gather everything wey you need.
Bonus: If you no understand di food, chop only do one wey you know until you dey convinced sey no be food wey go purge you.
Conclusion
Every country get their own wahala wey them de battle but some countries own pass other countries. Na why e good to know which country wahala you fit deal with if you want to visit them. These countries are countries wey US Department of State, UK and Canada Government don approve sey them dey safe for travelers.
