Hamster Kombat game don set new launch date.

After them delay their previous launch date wey suppose be July, yesterday, Wednesday August 28, them announce for their official telegram channel sey them go launch their HMSTR token on September 26.

What is Hamster Kombat?

Hamster Kombat na one of the leading tap-to-earn telegram games like Tapswap, Memefi, Sunwaves, wey people de use mine coins.

Since when them start the project,  Hamster don gather more than 300 million people wey de play the game since them start early this year.

And na one of the reason why them been delay the launching be that sake of sey, the project na big project.

Since this year start, crypto mining don gather more people as plenty projects launch back to back.

Projects like Notcoin, Avacoin and $Dogs don launch for inside this year, wey give more people ginger to begin mine coins.

For this tap-to-earn game, you go see people de tap their screens with their fingers make them for collect coins. These coins when them launch, them de call am airdrop and people fit trade them collect money or, hold them until their price go up.

Other projects like Tapswap and Memefi na similar tap-to-earn game and them sef never announce their launch date. But as many projects don launch, people de look forward to when them sef go launch make them for cash out.